Благовешенньӧ
Благовешенньӧ (рочӧн: Благовещенье, Благовещение) — коми йӧзкостса календарын вичко праздниккӧд йитчӧм лун, пасйӧны косму тӧлысь 7-ӧд лунӧ.
Нимъяс
вежныБлаговешенньӧ шуӧны медся ыджыд празьникӧн. Комияс нӧшта шуӧны Кӧк поз вӧчан лунӧн либӧ Додь вож бергӧдан лунӧн.
Эскӧмъяс
вежныМедся ёна йӧз костысь кывлан, мый тайӧ лунӧ оз позь уджавны. Нывъяс весиг юрсисӧ оз шыльӧдны, ни кӧса оз кыны, а колӧ кӧ пӧ кизь вурны — вур, но рытнас бӧр резьӧд. Йӧзыс шуӧны, мый тайӧ лунас кӧк поз тэчӧма, и Енмыс сійӧс мыждӧма празьник лунӧ уджалӧмысь. Сійӧн пӧ сэсся нэмсӧ позтӧг и олӧ. Та ради уналаын Благӧвешенньӧсӧ шуӧны «кӧк поз вӧчан лунӧн». Кутшӧм лун вылӧ веськалӧ Благӧвешенньӧыс, сы вежон лунӧ оз позь панны некутшӧм удж: гӧра-кӧдза, керка вӧчӧм.
Благӧвешенньӧӧдз пӧ тулысыс локтӧ на, а тайӧ лунсяньыс пӧ тулыс нин сэсся. Тулыс кӧ воис, сідзкӧ оз нин позь ветлыны доддьӧн. И тайӧ лунас додьсӧ вӧлӧм вежӧны телега вылӧ, та серти Эжва вожын Благӧвешенньӧсӧ шуӧны «додь вож бергӧдан лунӧн».
Благӧвешенньӧ лун кежлӧ пӧжалӧны черинянь, и быд нывбабаӧс гӧститӧдӧны чериняньӧн, ӧд тайӧ лунас пӧ Енмамыс тӧдмалӧма Кристосӧн нӧбасьӧм йылысь.
- Йӧз костын шуӧны: «Йӧлдӧття — чипанӧс юкталӧ, Сорока мученик — межӧс юкталӧ, Ӧльӧксей божъя — ӧшӧс юкталӧ, Благӧвешенньӧ — весь мирсӧ».
- Благӧвешенньӧ войӧ кӧ шоныд, тулысыс бур лоӧ.
- Благӧвешенньӧ лунӧ кӧ керка вылын лым, Ёгӧрей лунӧ (ода-кора 6-ӧд лунӧ) ыб вылын лым жӧ.