Захаренко Ангелина Михайловна

Захаренко Ангелина Михайловна (1946—2018) — Россияса нимйӧза велӧдысь (2008), общественнӧй удж вӧчысь.

Олан туй

Ангелина Захаренко чужӧма 1946-ӧд вося тӧвшӧр тӧлысь 1-ӧд лунӧ Кӧрткерӧс районса Шойнаты сиктын. 1970-ӧд восянь уджалӧма сэтчӧс школаын,1980-ӧд восянь веськӧдлӧма велӧдчанінӧн.

Сылӧн веськӧдлігӧн Шойнатыса школаын восьтӧмаӧсь прогимназия да видз-му нырвизя классъяс, а 2001-ӧд воын — 20-ӧд номера училишӧлысь филиал.

Водзмӧстчысь ань зільӧма коми кыв видзӧм-сӧвмӧдӧмын, вӧлӧма 8-9 классъясын велӧдчысьяслы небӧг дасьтысьяс пиысь ӧтиӧн.

Кулӧма 2018-ӧд вося йирым тӧлысь 14-ӧд лунӧ. Гуалӧма шойнатыса шойнаын.

Общественнӧй удж

Ангелина Захаренко тӧдса кыдзи зіль да водзмӧстчысь общественник. 1996-ӧд воын пырӧдчылӧма Венгрияын Фин-йӧгра войтыр II Ставмирса конгрессӧ.

Водзмӧстчӧма «Коми войтыр» ӧтмунӧмын, Коми Республикаса вужвойтыр аньяслӧн котырын, Коми Республикаса Общественнӧй палатаын.

Сійӧс бӧрйывлӧмаӧсь сиктса да районса сӧветъясӧ депутатӧн.

Ошканпасъяс

• Россияса нимӧдана велӧдысь (1996)
• Россияса нимйӧза велӧдысь (2008)
• Коми ССР-са школаын нимӧдана велӧдысь

Ӧшмӧсъяс

• «Коми войтыр» сайт (комиӧн; 2018.10.14)
• В Корткеросе умерла Народный учитель РФ Ангелина Захаренко // «Комиинформ» юӧр сетан агентство (рочӧн; 2018.10.14 лун)