Неркаги Анна Павловна

Неркаги Анна Павловна
Чужан лун:	1952-ӧд вося урасьӧм тӧлысь 15-ӧд лун(1952-02-15) (72 арӧс) или 1952-ӧд вося ӧшым тӧлысь 12-ӧд лун(1952-12-12) (71 ар)
Чужанін:	Полярный Урал[d]
Канму:	Рочму
Мыйся уджыс:	писательница

Неркаги Анна Павловна (1951) — яран гижысь. Яран кывйысь Неркаги вуджӧдсьӧ кыдзи «кусыньтчытӧм рӧд».

Олан туй

Чужис 1951 вося урасьӧм тӧлысь 15-ӧд лунӧ Полярнӧй Уралса Сайрей керӧс бокын. 1970 воын помаліс Тюмень обласьтса Приуральскӧй районысь Аксарка посёлокын шӧр школа. Пырис велӧдчыны Тюмень индустриальнӧй институтса геологоразведочнӧй факультетӧ, но 2 во мысти дзоньвидзалун вӧснаыс эновтіс.

1975—1976 воясӧ уджаліс методистӧн Тюмень обласьтса культура управлениеын.

Олӧ да уджалӧ Приуральскӧй районса Лабӧрӧвӧй посёлокын. Быдтӧ мукӧдлысь челядьсӧ. Лӧсьӧдіс «Земля надежды» кресьтяна-фермер овмӧс, медым могмӧдны сёян-юанӧн Байдарайӧй тундраса кӧр видзысьясӧс.

Гижан удж

Медводдза повесьтыс — «Анико из рода Ного»; сыысь юкӧнъяс петавлісны «Самотлор» альманахын 1975 воын. Дзоньнас повесьтыс петіс 1977 воын «Молодая гвардия» небӧг лэдзанінын, мый вӧлі вылӧ донъялӧма том гижысьяслӧн VI ставсоюзса совещанньӧ вылын.

1978 восянь СССР-са гижысь котырӧ пырысь.

Сэсся «Урал» журнал йӧзӧдіс «Илир» повесьт. Сёрӧнджык кыкнан повесьтын выльпӧв вӧлі йӧзӧдӧма «Современник» небӧг лэдзанінын. «Белый ягель» повесьт петіс ыджыд косталӧм бӧрын: медводз «Под сенью Нохар-Юха» альманахын 1995 воын дженьдӧдӧмӧн, а сэсся 1996 воын ставнас. 1996 воын йӧзӧдӧма «Молчащий» повесьт.

Нималана гижысь Юрий Рытхеу тадзи донъяліс том гижысьӧс: «Сегодняшний Север, который описывает Анна Неркаги, — это не далекий заброшенный край, а часть нашей огромной страны, в которой кипит созидательная работа и где живут люди, преданные этой земле и нелегкому труду на ней. Творчество Анны Неркаги глубоко современно и проникнуто духом новаторства».

2015 воын Уралса федеральнӧй университетысь XX да XXI нэмся роч литература кафедра вӧзйис Анна Неркагиӧс Нобель премиа босьтысьпуӧн.

2016 воын петіс «Песнь творцу» выль небӧг, кытчӧ пырисны яран легенда, предание да нӧдкывъяс, а сідзжӧ «Лӧня олысь» повесьт.

Анна Неркагилысь гижӧдъяссӧ тӧдӧны уналаын. Гижӧдъяс сертиыс дорйӧма куим диссертация. Повесьтъяссӧ вуджӧдӧны Венгрияын, АӦШ-ын, Италияын, Канадаын, Финляндияын.

Небӧгъяс

• Анико из рода Ного (1977)
• Илир (1979)
• Мы — дети твои, Север! (1986)
• Белый ягель (1995)
• Молчащий (1996)
• Песнь творцу / Худ. В.Полушкин. 2016

Экранизация

• 2014 воын «Белый ягель» да «Анико из рода Ного» повесьтъяс серти Владимир Тумаев снимайтіс «Белый ягель» кинофильм.

Общественнӧй удж

Анна Неркаги — семья-рӧд школаса концепциа да школа лӧсьӧдысьяс лыдын. Школа босьтчис уджавны 1990-ӧд вояс помсянь Лабӧрӧвӧй посёлокса ичӧт школа подув вылын. Концепция подуласьӧ «этнопедагогика» принцип вылӧ, челядь босьтӧны чужанін йылысь тӧдӧмлун. Анна Павловна чайтӧ, мый овнытӧ тундраын колӧ велӧдчыны.

«Земля надежды» кресьтяна-фермер овмӧслӧн му вылын быд гожӧм нуӧдӧны кытшса челядьлы «Земля надежды» православнӧй палаточнӧй лагер.

Премияяс

• Н.М. Чукмалдин нима премиа босьтысь.

Наградаяс

• Ямал-Яран асвеськӧдлан кытшса почётнӧй олысь

Ӧшмӧсъяс

• Livelib сайтын Анна Неркаги йылысь
• Ямальская писательница выдвинута на Нобелевскую премию // ФИНУГОР сайт (2013.01.30; рочӧн)