Бажуков Николай Серафимович
| Бажуков Николай Серафимович | |
| Чужан лун: |
1953-ӧд вося сора тӧлысь 23-ӧд лун (70 арӧс) |
|---|---|
| Чужанін: | |
| Канму: | |
| Мыйся уджыс: | |
| Ошканпасъяс да премияяс: |
  |
Бажуков Николай Серафимович (1953) — СССР кадӧ лызьӧн нималана коми котралысь, тӧвся Олимпиадаясын кык зарни (1976, 1980) да ӧти ыргӧн (1980) медаль босьтысь, ставмирса чемпионатъясын кыкысь вермысь, СССР-са кубок нёльысь босьтысь, СССР-са чемпионатъясын кӧкъямысысь вермысь, СССР-са спортын нимӧдана мастер (1976).
Олан туй вежны
Николай Бажуков чужис 1953 вося сора тӧлысь 23-од лунӧ Коми АССР-са Мылдiн сиктын. Сылӧн медводдза тренерӧн вӧлі Владимир Шаманов, коді 2004 воын лои Россияса нимӧдана тренерӧн. Сійӧ казьтыштіс, мый коркӧ Николай Бажуков эз кӧсйы мунны сборъяс вылӧ. Сэки кутісны тренируйтчыны гортас. Кор кывсис, мый Пузла вӧр пӧрӧдан овмӧсӧ, кытчӧдз 70 км, колӧ нуны груз, В.Шаманов вӧзйысис да Н. Бажуковкӧд нопйӧн мӧдӧдчис сэтчӧ.[1]
Помаліс Мылдінын кӧкъямыс класс, уджаліс слесарлӧн ученикӧн мылдінса автотранспорт предприятиеын. Зіля котраліс лызьӧн «Труд» ДСО-ын, пырӧдчис том йӧз пӧвстын ставсоюзса да войтыркостса ордйысьӧмъясӧ.
1973 вося ода-кора тӧлысьӧ муніс служитны армияӧ. 1974—1977 воясӧ велӧдчис Ленинградын физическӧй культуралӧн военнӧй институтын тренеръяслӧн школаын, кодӧс помаліс 1984 воын «тренер-велӧдысь» специальносьт серти. 1974—1984 воясӧ — лызьӧн котралӧмысь СССР-са сборнӧйын.
1984 воӧ вуджӧ тренер удж вылӧ, дасьтӧ Коми Республикаса мужичӧйяслысь сборнӧй, а сідзжӧ вооруженнӧй вынъяслысь лызьӧн котралысьяслысь сборнӧй.
Вермӧмъяс вежны
СССР-са чемпионатъяс вежны
Н. Бажуков СССР-са чемпионатъясын босьтіс кӧкъямыс зарни, нёль эзысь да вит ыргӧн медаль. 1974 воын шедӧдіс медводдза медальяссӧ СССР-ын войтыръяскостса Спартакиадаын да СССР-са чемпионатын, кодъяс мунісны Свердловскын. Сійӧ босьтіс ыргӧн медаль 15 километра котӧртігӧн да зарни медаль — 4х10 километра вылӧ эстафетаын РСФСР-са сборнӧй лыдын.
4х10 километра вылӧ эстафетаын СССР-са чемпионӧн вӧлі 1974, 1977, 1978, 1979, 1981 воясӧ; 15 километра котӧртӧмын — 1976 да 1983 воясӧ.
Нёльысь босьтліс СССР-са Кубок, унаысь вермывліс кубокъяс да спартакиадаяс. Кӧкъямысь вӧлі вермысьӧн «Спартакиада дружественных армий» войтыркостса ордйысьӧмъясын.
Европаса чемпионат вежны
1973 воын Николай Бажуков вӧлі пырӧ СССР-са томуловлӧн сборнӧйӧ да ветліс Европаса чемпионат вылӧ, кӧні 3х10 километра вылын эстафетаын лоины медводдзаӧн, да босьтіс ыргӧн медаль 15 километра котӧртігӧн.
Ставмирса чемпионатъяс вежны
Бажуков Николай ветліс ставмирса чемпионатъяс вылӧ 1976, 1978 да 1980 воясӧ, шедӧдіс кык зарни да ӧти ыргӧн медаль.
Олимпиада ворсӧмъяс вежны
1974-сянь 1984-ӧд воясӧдз — лызьӧн котралӧмысь СССР-са сборнӧйын. Ветліс кык тӧвся Олимпиада вылӧ, кыкысь босьтліс зарни медаль.
1976 воын XII тӧвся Олимпиада ворсӧмъяс дырйи (Инсбрук, Австрия) босьтіс зарни медаль 15 километра котӧртігӧн. Бажуков лои медводдза сӧветскӧй спортсменӧн, коді вермис тайӧ дистанция вылас тӧвся Олимпиада ворсӧмъяс дырйи. Та кындзи 4х10 километра вылӧ эстафетаын шедӧдіс ыргӧн медаль.
1980 воын XIII тӧвся Олимпиада ворсӧмъяс дырйи (Лейк-Плесид, АӦШ) босьтіс медводдза места 4х10 километра вылӧ эстафетаын. 30 километра котӧртігӧн воис сӧмын 14-ӧн.
Наградаяс вежны
- «СССР-са спортын нимӧдана мастер» почёт ним (1976)
- «Почёт пас» орден (1976, 1980)
- Коми АССР-са культураын нимӧдана уджалысь (1976)
- Сыктывкарса почётнӧй олысь (2000, косму тӧлысь 19 лун)
- Мылдін районса почётнӧй олысь (2016)[1]
- «Коми Республикалы 100 во» медаль (2021)[2]