Тувсов Ёгорей лун

Тувсов Ёгорей лун (рочӧн Егорий Вешний) — православнӧй вичкоса гаж, пасйöны ода-кора тӧлысь 6-ӧд лунӧ.

Ёгорей лунсӧ уналаын шуӧны «вӧв нимлунӧн», «вӧв празьникӧн» либӧ «вӧв вежӧдан лунӧн». Празьник лун кузя вӧвъясӧс оз уджӧдны, лэдзӧны гуляйтны-тімбылясьны, йирсьыны, мед пӧ Ёгӧрей-батюшкоыс тошнас йирсьӧдас вӧвъяссӧ.

Унджык сиктын лэдзлӧны став скӧтсӧ йӧрӧ ли карта вылӧ гуляйтны. Луздорын да Сыктыв вожын лэдзтӧдзыс сетӧны Ыджыд четвергся нянь да сов, вачкалыштӧны берба лунся шатьясӧн да шыӧдчӧны Ёгорей дорӧ, мед видзас да кранитас скӧтсӧ и кӧзяеваӧс став лёксьыс-притчасьыс, здоровье сетас гожӧм кежлас. Та могысь жӧ Эжва вожын скӧтсӧ лэдзтӧдзыс резӧны вежа ваӧн да пернапасалӧны плешсӧ.

Туръяын тайӧ лунас вайӧдлӧны став скӧтсӧ вичко дорӧ, нуӧдӧны молебен да вӧтлӧны кык бипур косттi. Тадзи жӧ вӧчӧны и Емдiнын. Аслыспӧлӧса тайӧ луныс кольӧ Изьваын: скӧтсӧ йӧртӧны загонӧ, молебен нуӧдӧм бӧрын поп резӧ скӧтсӧ вежа ваӧн.

Кутшӧмсюрӧ грездын вӧлӧмаӧсь Ёгорей часовняяс. Ёгорей лунас сэтчӧ чукӧртлӧмаӧсь скӧтсӧ, и вичкосяньыс попыс волӧма нуӧдны скӧт молебенсӧ. Татшӧм грездъясас Ёгорейыс лоӧ престольнӧй празьникӧн (сура празьникӧн): локталӧны-чукӧртчӧны орчча сикт-грездысь войтырыс, гӧститӧдчӧны, сьылӧны-гуляйтӧны.

Ёгорей лунӧ асывсяньыс пывсьӧны, киськасьӧны ваӧн, туплясьӧны ва гӧпъясын, медым мынтӧдчыны висьӧмъясысь.

Приметаяс: вежны

  • Ёгорей лунӧ кӧ увтасінъясын лымъя на, нӧшта кык вежон оз ло шоныд.
  • Ёгорей лунӧ кӧ шоныд, водзӧ шоныд жӧ лоӧ.
  • Егорей дырйи кӧдзыд — сю бура артмас.
  • Егорей лунӧ кӧ вой тӧв, сэк нелямын лун лоӧ вой тӧв.
  • Егорей ваа кӧ, Микӧла туруна лоӧ.

Ӧшмӧсъяс вежны

  • Коми календар. 2009 во / Лӧсьӧдіс Ӧльӧш Рассыхаев. — Сыктывкар, 2008.