Перепелица Яков Сергеевич

Перепелица Яков Сергеевич
Чужан лун:	1927
Мыйся уджыс:	шылад тэчысь

Перепелица Яков Сергеевич (1927—1990) — Комиысь шылад тэчысь, велӧдысь.

Олан туй

Чужӧма 1927-ӧд вося йирым тӧлысь 13-ӧд лунӧ Украинаын Харьков обласьтысь Липет районса Весёлӧй сиктын. 1935-ӧд воын семьяыс вуджӧма овны Сыктывкарӧ батьыс ордӧ, кодӧс татчӧ ыстӧмаӧсь 1930-ӧд воын. 1942-ӧд воын помалӧма школаын 7 класс.

Шылада тӧдӧмлун босьтӧма медводз Сыктывкарса челядьлы шылада школаын (1940–1942), а сэсся Сыктывкарса шылада училишӧын (ӧні Коми Республикана искусствояс колледж) К. В. Козлов велӧдысь дорын баян класс серти. Композицияысь урок босьтӧма В. В. Микошолысь да В. В. Мореновлысь.

1942-ӧд вося ӧшым тӧлысьӧ Я. С. Перепелицаӧс босьтӧмаӧсь Концертно-эстраднӧй бюролӧн (ӧні Коми Республикаса филармония) штатӧ: медводз баянистлӧн отсасьысьӧн, а сэсся баянистӧн.

1944—1956-ӧд воясӧ уджалӧма Коми АССР-са сьылан да йӧктан каналан ансамбльын (ӧні Коми Республикаын В. Морозов нима «Асъя кыа» сьылан да йӧктан каналан ансамбль) — баянистӧн, концертмейстерӧн да хормейстерӧн.

1958—1979-ӧд воясӧ Я. С. Перепелица велӧдӧма Сыктывкарса шылада училишӧын. 1979—1990-ӧд воясӧ веськӧдлӧма Коми АССР-са шылад тэчысьяслӧн котырӧн.

Я. С. Перепелица вӧлӧма Коми АССР-са Вылыс Сӧветса депутатӧн квайтӧд созывын (1963—1966), СССР-са шылад тэчысьяслӧн котырын Шӧр ревизионнӧй комиссияӧ пырысьӧн (1979), Сыктывкар карса народнӧй депутатъяслӧн Сӧветӧ пырысьӧн, Коми АССР-са культура министерстволӧн коллегияӧ пырысьӧн.

Кулӧма 1990-ӧд вося сора тӧлысь 7-ӧд лунӧ.

Ошканпасъяс

• Уджвывса Гӧрд дӧрапас орден (1971)
• РСФСР-са культураын нимӧдана уджалысь (1965)
• Коми АССР-са каналан премия босьтысь (1969)

Ӧшмӧсъяс

• Чисталев П. Перепелица Яков Сергеевич // Республика Коми: энциклопедия: в 3-х т. — Сыктывкар, 1999. — Т. 2. — С. 423—424.
• Герстле Н. Композитор Перепелица Яков Сергеевич // Дыхание пармы: книга об искусстве и литературе народа коми. — Сыктывкар, 1991. — С. 269—271.
• Перепелица Яков Сергеевич // Коми Республикаса Вужвойтырлӧн небӧгаин