Шегйӧн ворсны

(водзӧ ыстӧма «Шегйöн ворсны»ысь)

Шег — коми йöзлöн важся ворсöм. Ворслiсны том и челядь, ёнджыкасö — Вежадыр кадколастö (Рöштвосянь Ва вежöдан лунöдз).

Ворсӧм ним вежны

Ворсöм нимыс быдлаын öткодь – Шегйöн ворсны, Шегъясьны, Шегъясьöм, некымын изьва сиктын шуöны Бабкаöн ворсны.

Ворсанног вежны

Ворсöны ыж шегъясöн – пемöсыслöн бöръя коксьыс лыясöн. Мукöддырйи лыяссö краситöны лöз либö гöрд рöмöн. Ворсöны джоджын, пызан либö паччöр вылын.

Ворсöм вылö колö босьтны сы мында шег, медым быдöнлы вöлi öтмында (40 шег, 4 ворсысь, быдöнлы 10).

Медводз лöсьöдöны öчередь: ставöн босьтö шег да шыбитö пызан вылö. Öчередь лöсьöдiгöн колö тöд вылын кутны шег бокъясыслысь вынсö. Медвынаöн лыддьысьö стол (шыльыдладорнас вывлань), мöдöн – сак (кык гöпнас вывлань), коймöдöн – пук (мылькнас вывлань), медся жебöн – гатш (гураннас вывлань).

Ворсысьяслöн кö шегъясыс усьöны öткодя, ас костаныс найö выльысь шыбитöны лыяссö. Öчередь лöсьöдöм бöрын медводдза ворсысьыс чукöртö соддзас шегъяссö да койыштö пызан вылö. Сэсся пондö печлавны öткодя куйлысь шегъяссö: пуксö пукö, гатшсö гатшö, и с.в. Инмас кö, босьтö на пиысь öтисö да водзö печлалö. Оз кö веськав либö инмас кö коймöд шегйö (та дырйи шуöны куималiс), сэки кутас печлавны мöд ворсысь.

Öшыбкаöн лоö, кор ворсысь печиктас да оз веськав чуньнас шегйö, либö тöдлытöгыс вöрзьöдас кинас либö паськöмнас мукöд лысö. Ворсiгöн оз позь вежны пукалан местатö. Кор кодкö торксьö, сэки мöд ворсысь чукöртö шегъяссö соддзас да койыштö пызан вылö. Ворсöмыс помасьö сэк, кор бöръя кык шегйыс усьö öткодя, да ворсысь стöча инмас. Мöд конас ворсысьяслöн öчередь лöсьöдöны чукöрмöм шег лыд серти. Кодлöн медуна лыыс, сiйö медводдзаöн кутас печлавны.

Ворссьысьöс мыждöны плешкö печлалöмöн. Шуам, кор 40 шегйöн ворсöны нёльöн, сэки шöркодя быдöнлы воö 10 лы. Кодлöн дассьыс этшаджык, сiйö «ньöбö» мöд ворсысьлысь сы мында шег, кымын оз тырмы дасöдзыс. Быд сетöм шегйысь печиктöны.

Ӧшмӧсъяс вежны

  • Коми ворсöм да гаж: тöрыт да талун / Лöсьöдiсны Л.Н. Камбалова, А.Н. Рассыхаев. – Сыктывкар: Кола, 2007. – 76 л.б.
  • Коми календар. 2009 во / Дасьтiс А.Н. Рассыхаев. – Сыктывкар: Кола, 2008. – 385 л.б.
  • Рассыхаев А.Н. Чинки, Киколь да Геч: Коми йӧзкостса ворсӧмъяс. – Сыктывкар: Кола, 2011. – 64 л.б.
  • Рассыхаев А.Н. Игры с шегами (в бабки) в традиционной культуре коми // Фольклористика Коми / Тр. ИЯЛИ Коми НЦ УрО РАН. – Сыктывкар, 2002. – Вып. 63. – С. 91-104.