Кунгин Василий Прокопьевич
Кунгин Василий Прокопьевич (1863—1936) — кресьттяна пиысь асшӧр гижысь, чужан му тӧдмалысь.
Олан туй вежны
Василий Кунгин чужӧма 1863-ӧд вося косму тӧлысь 12-ӧд лунӧ Перым губерняысь Чердін уездса Покча сиктын. Чужӧма кресьттяна семьяын. Помалӧма Покчаын куим вося вичкобердса школа 1874-ӧд воын.
1890-ӧд воын овмӧдчӧма Помӧсдін сиктӧ, босьтчӧма литература уджӧ. Йӧзӧдчылӧма «Сельский вестник» да «Родина» газетъясын, «Известия Архангельского общества изучения Северного края» журналын (1926—1934).
Кулӧма 1936-ӧд вося рака тӧлысь 21-ӧд лунӧ, гуалӧма Сыктывдін районса Выльгорт сикт шойнаын. Гуыс абу тӧдса.
Гижан удж вежны
Гижлӧма кывбуръяс да пьесаяс. Медыджыдыс — документальнӧй висьтъяс да очеркъяс, кӧні висьтавсьӧ XIX нэм пом — ХХ нэм заводитчӧмӧн олӧм.
Автор серпасалӧ Коми муын революцияӧдзса лоӧмторъяс, Гражданскӧй тыш да колкоз артман вояс. Кунгин гижӧма сталинкадся репрессияяс, Эжва, Печора да Перым вожса йӧзлӧн обычаяс йылысь.
Василий Кунгин мемуаръясас гижӧма и Л.Н. Толстойкӧд Москваын паныдасьлӧм йылысь (1896). Кывбуръяссӧ лыддьӧм бӧрын Лев Николаевич сетӧма Кунгинлы вӧзйӧм: «Чтобы поэтом быть — нужно им родиться. А чтобы быть писателем, нужно много думать, тогда дума рождает мысль, а мысль рождает слово. Когда вы будете писать о чем-либо — сначала обдумайте, будут ли верить написанному вами. Если будут, то вы будете считаться писателем».
Коми Республикаса национальнӧй архивын лӧсьӧдӧма В.П. Кунгинлӧн личнӧй фонд, кытчӧ чукӧрмӧма 1500 гӧгӧр лист. 1930-ӧд воясын репрессияяс дырйи кипомысь уна гижӧд вошӧма. Вӧвлӧм коробейникӧс (посни торъясӧн вузасьысьӧс), коді 1917-ӧд воӧдз чукӧртлӧма неуна сьӧм, арестуйтӧмаӧсь да шуӧмаӧсь «кулакӧн».
Небӧгъяс вежны
- Кунгин В.П. Наивные повести из жизни Севера / Ред.-сост. М.Д. Игнатов, Д.И., Напалков. — Сыктывкар: Эском, 2012. — 304 л.