Ляшев Владимир Александрович

Ляшев Владимир Александрович
Чужан лун:	1942-ӧд вося урасьӧм тӧлысь 7-ӧд лун(1942-02-07)
Чужанін:	Визин, Коми Автономнӧй Сӧветскӧй Социалистическӧй Республика, РСФСР[d], Сӧветскӧй Социалистическӧй Республикаяслӧн Союз
Кулан кад:	1999-ӧд вося косму тӧлысь 1-ӧд лун(1999-04-01) (57 арӧс)
Куланін:	Сыктывкар, Рочму
Канму:	Сӧветскӧй Социалистическӧй Республикаяслӧн Союз  Рочму
Мыйся уджыс:	филолог

Ляшев Владимир Александрович (комиӧн — Ӧльӧксан Володь) (1942—1999) — коми кыв туялысь, филология наукаясса кандидат (1977).

Олан туй

Владимир Ляшев чужӧма 1942-ӧд вося урасьӧм тӧлысь 7-ӧд лунӧ Сыктыв районса Визин сиктын. 1964-ӧд воын помалӧма Коми канмуса педагогика институтысь история-филология пакультет. 1964—1965-ӧд воясын служитӧма армияын. 1965—1971-ӧд воясын велӧдӧма Сыктывдін районса школаясын. 1971-ӧд воын пырӧма велӧдчыны СССР-са наукаяс академиялӧн Коми филиалысь аспирантураӧ «Фин-йӧгра кывъяс» специальносьт серти. Аспирантура помалӧма 1974-ӧд воын Москваса Кыв туялан институтын, кӧні пропессор Илля Вась веськӧдлӧм улын гижӧма «Фонетико-морфологические особенности вымского диалекта коми языка» кандидат ним вылӧ диссертация. Диссертация дорйӧма Тартуса университетын 1977-ӧд воын. Кыв, литература да история институтын 1974-ӧд восянь уджалӧма младшӧй научнӧй сотрудникӧн, 1982-ӧдсянь — старшӧй научнӧй сотрудникӧн.

1987-ӧд воын вуджӧма уджавны Велӧдысьясӧс сӧвмӧдан институтӧ. 1996—1997-ӧд воясын веськӧдлӧма Велӧдан юкӧнын уджалысьяслысь уджсикас кыпӧдан республикаса институтын коми кыв, литература да культура кафедраӧн.

Кулӧма 1999-ӧд вося косму тӧлысь 13-ӧд лунӧ Сыктывкарын, гуалӧма Сыктывдін районса Сёськаын.

Туясян удж

Туясян нырвизьяс — коми кывлӧн сёрнисикасъяс да лингвогеография. 1976-ӧд воын уджалӧма «Лингвистический атлас мира» канмукостса тема серти.

Йӧзӧдӧма 80 сайӧ туясян удж да велӧдчан небӧг, на лыдын Кыв, литература да история институтын уджалігӧн — 52 удж. Мукӧдыскӧд ӧтвылысь гижӧма «Современный коми язык. Лексикология» (М., 1985) монография, «Словарь антонимов коми языка» (Сыктывкар, 1992), «Школьный этимологический словарь коми языка» (Сыктывкар, 1996), 8-9 классъяслы коми кывйысь велӧдчан небӧг (Сыктывкар, 1991, 1995), «Коми кыв» энциклопедия (М., 1998), коми кывйысь кык велӧдчан пособие.

В.А. Ляшев отсасьӧма дасьтыны финн-йӧгра туялысьяслысь XV ставсоюзса конференция (1979), финн-йӧгра туялысьяслысь VI Войтыркостса конгресс (1985).

Сійӧ лыддьӧма лекцияяс коми кыв грамматикаысь да сёрнисикасъясысь Сыктывкарын, Будапешт да Удмурт университетъясын.

Ошканпасъяс

• Коми АССР-са Вылыс Сӧветысь Президиумлӧн Почёт грамота (1985)

Ӧшмӧсъяс

• Ученые Института языка, литературы и истории Коми научного центра УрО РАН: Биографический справочник / Сост. И. Л. Жеребцов. — Сыктывкар, 2000. — 212 с.