Мишарин

Мишарин — коми йӧз пӧвстын тшӧкыда паныдасьлысь ов.

Тайӧ овыс паськыда тӧдса Эжва катыдын — Кулӧмдін да Кӧрткерӧс районъясын.

Кыдзи гижӧ коми овъяс туялысь Плесовский Ф.В. "Комиын овъяс" небӧгын, медводдза Мишаринъяс вӧлӧмаӧсь Висер погостса Ыджыдвидз (Кӧрткерӧс район) грездын. Сэні олӧмаӧсь куим вок: «Сидорко Федоров сын Мишарин, Терешка Федоров сын Мишарин». Сылӧн пиыс – Епифанко – гӧтырыскӧд мунӧма Сибырö. Коймӧд вокыс — «Васька Федоров сын Мишурин» Аврамко да Федко пияныскӧд мунӧма выль погостӧ – Кулӧмдінö.

1720 воын Мишаринъяслӧн Ыджыдвиддзын вӧлӧма куим овмӧс, Кулӧмдінын — кӧкъямыс, Важкурьяын – куим.

Роч йӧз пӧвстын Мишарин важ овъяс лыдас абу, эм Мишурин: «Мишурин Василий Михайлович Обрюта, дворцовый дьяк» (1530-1550 вояс); «Семен Обрютин Мишурин, XVI-ӧд нэм шӧр» («Ономастикон»).

Ф.В. Плесовский чайтӧ, мый Эжва катыдса Мишаринъяс — «мишура» кывсянь (Кулӧмдінӧ мунысь Мишаринсӧ Йӧзӧс гижалан небӧгын пасйӧма Мишуринӧн). «Мишура»-ыс — эзысь да зарни сунисъясӧн мичмӧдӧм новланторъяс; «мишурникыс» — мича паськӧм вӧснаыс вылӧ пуксьысь морт.

Нималана йӧз

• Мишарин Алексей Иванович (1903—1977) — Социалистическӧй уджвывса Герой, хирург.
• Мишарина Нина Петровна (чужис 1931) — Коми АССР-са нимӧдана велӧдысь.
• Мишарина Александра Петровна (1946—2013) — коми гижысь.
• Мишарин Алексей Васильевич (1949) — коми гижысь.
• Мишарин Александр Николаевич (чужис 1939) — роч драматург да сценарист.
• Мишарин Александр Сергеевич (чужис1959) — роч политик, Свердловск обласьтӧн веськӧдлысь.

Ӧшмӧсъяс

• Плесовский Ф.В. Комиын овъяс / Сост. И.Л. Жеребцов. — Сыктывкар, 1997. — 141 с.