Петыр лун

Петыр лун (рочӧн Петров день, Петровки) — православнӧй вичкоса гаж, пасйӧны сора 12 лунӧ.

Петыр лун – сура празьник Кулӧмдін районса Кулӧмдінын да Скӧрӧдумын, Емдін районса Ремиын, Койгорт районса Гриваын, да Луздор районса Читаёв сикт улӧ пырысь Екшорын, и с.в.

Петыр лун вӧлі ыджыд праздникӧн. Кыдзи и мукӧд ыджыд вежа лунъясӧ, та лунӧ эз тшӧктыны уджавны, Енмыс пӧ вермас мыждыны.

Петыр лун шуӧны гожӧм шӧрӧн: кодкӧ кӧ керкасьыд ӧдзӧстӧ оз тупкы, сійӧс ӧлӧдӧны «Абу ӧд Петыр лун!»

Турун пуктӧм

Та лунӧ эновтчылӧны турун пуктӧмысь. Уджалӧны пажынӧдз, а сэсся воӧны гортас ылысса видзьясысь пывсьыны да петырлунасьны. Ӧтилаын – пажынӧдз позьӧ сӧмын куртны водзынсӧ ытшкӧм турун, но эз ытшкыны; мӧдлаын – пажун бӧрын мӧдӧдчӧны нин видзьяс вылӧ страдуйтны.

Чери кыйӧм

Чери кыйысьяс пасйӧны Петыр лунӧ ассьыныс празьник. Шыасьӧны Петыр-Павел дорӧ, корӧны чери: «Петыр-Павел, чери сет!» Кыйӧм чериысь пуӧны юква да корӧны тӧдсаяссӧ видлыны сійӧс.

Кодрасьӧм

Бӧръя кадӧ Петыр лунӧ гуяс вылын кодралӧны Троича бӧрын кувсьӧм йӧзӧс. Блин, чипан кольк кындзи лӧсьӧдӧны выль лук турунысь сёянтор.

Эскӧмъяс

Петыр лунӧ вичкоын лук турун вежӧдӧм бӧрын позьӧ сійӧс чегъявны да сёйны.

Мукӧдлаын оз тшӧктыны Петыр лунӧдз вотны оз тусь.

Примета:

• Петыр лунӧ кӧ оз зэр, оз зэр Прокопейӧдз.

Шусьӧг:

• Томлуныд абу Петыр лун, мӧдысь оз ло.

Ӧшмӧс

• Коми календар. 2009 во / Лӧсьӧдіс Ӧльӧш Рассыхаев. — Сыктывкар, 2008.