Старцева Любовь Афонасьевна

Старцева Любовь Афонасьевна
Чужан лун:	1959-ӧд вося йирым тӧлысь 10-ӧд лун(1959-10-10) (65 арӧс)
Чужанін:	Паль[d], Иньвайыв сикт овмӧдчӧмин[d], Кудымкар район, Перым Коми кытш, Пермская область[d], РСФСР[d], Сӧветскӧй Социалистическӧй Республикаяслӧн Союз
Канму:	Сӧветскӧй Социалистическӧй Республикаяслӧн Союз  Рочму
Мыйся уджыс:	поэтесса, писательница

Старцева Любовь Афонасьевна (1959) — перым коми гижысь, перым-коми литература туялысь.

Олан туй

Любовь Старцева чужӧма 1959-ӧд вося йирым тӧлысь 10-ӧд лунӧ Кудымкар районса Паль грездын. Помалӧма Иньвайывса шӧр школа (1977), Кудымкарса лесотехническӧй техникумысь «Вӧр петкӧдан туйяс вӧчӧм да дӧзьӧритӧм» юкӧд (1980). Техникум помалӧм бӧрын уджалӧма Перым обласьтса Яйва посёлокын стрӧитчысь котыръясын, Чайковский карса небӧгаинаын. Уджысь орӧдчытӧг 1984—1991-ӧд воясӧ велӧдчӧма Удмурт университетса филология факультетын. 1985-ӧд воын бергӧдчӧма Перым Коми кытшӧ, недыр уджалыштӧма Кудымкарын электроприборнӧй заводын.

1987—1998 воясын редакторалӧма Перым-Коми небӧг лэдзанінын. 1999 восянь уджалӧма Коми наука шӧринса Кыв, литература да история институтлӧн общественнӧй наукаяслӧн Перым-Коми отделын, туялӧма перым-коми литература. Сёрӧнджык тайӧ юкӧныс пырӧма Перым наука шӧринӧ.

Гижан удж

Любовь Афонасьевна гижӧ кывбуръяс да проза. Кывбуръяс гижны босьтчӧма школаын велӧдчигӧн на. Медводдза гижӧдсӧ йӧзӧдӧма «По ленинскому пути» газетын 1978-ӧд воын. Кывбуръясыс да висьтъясыс петавлісны Перым-Коми кытшса газетъясын да ӧтувъя небӧгъясын: «Парма» газетын, «Иньва» да «Бичирок» литературно-художественнӧй чукӧръясын, «Ступени надежд», «Притяжение», «Ожерелье Пармы» да «Уна рöма сикöтш» ӧтувъя чукӧръясын, «Силькан» челядь журналын, «Versmondo» маддяр журналын, «Сятко» мордваса журналын, «Онычко» мари журналын; сідзжӧ пырӧмаӧсь «Зарниа рöм» антологияӧ, фин-йӧгра поэзияса «Кuum öö» антологияӧ (Таллинн).

Бӧръя кадӧ медсясӧ гижӧ проза. Сылӧн петавлӧма некымын асшӧр небӧг. 1992-ӧд воын йӧзӧдӧма Кудымкарын «Ӧкта усялӧм звездаэз» кывбуръяса медводдза чукӧр. 1999-ӧд воын Перым Коми небӧг лэдзанін йӧзӧдӧма «Сьӧлӧм говк» кывбуръяса мӧд чукӧр, 2006-ӧд воын — челядьлы «Чӧскыт козин» висьт чукӧр.

2007 восянь пырӧ Россияса гижысь котырӧ.

Туясян удж

Туялӧ перым коми литература. Йӧзӧдӧма перым коми гижысьяс йылысь «В мире поэзии» сборник (Кудымкар, 2005).

Л. А. Старцева пырӧдчӧма Фин-йӧгра гижысьяслӧн ставмирса конгрессъясӧ: V (Сыктывкар, 1998), VI (Саранск, 2000), VII (Ижкар, 2002), IX (Петрозаводск, 2006).

Ӧшмӧсъяс

• Коми-пермяцкие писатели: Биографический справочник для образовательных учреждений. В 2 ч. Часть II. / Авт.-сост.: Н. А. Мальцева. — Кудымкар, 2006. — С. 32—33.