Открыть главное меню

Олан туйПравить

Михаил Доронин чужӧма Вӧлӧгда губерняысь Усть-Сысольск уездса Шыладор сиктын 1902 вося кӧч тӧлысь 4-ӧд лунӧ.

1921 воын помалӧма сӧветскӧй партийнӧй школа. Уджалӧма вӧлӧсьтса исполкомын делопроизводительӧн да секретарӧн. Служитӧма Гӧрд Армияын. Демобилизация бӧрас уджалӧма Емдін уездса большевик партия комитетын пропагандистӧн. 1927 восянь — Михаил Доронин Удора районса исполкомын веськӧдлысь.

1930-ӧд вояс пансигӧн велӧдчӧма редакторъяслӧн да газетса уджалысьяслӧн курсъяс вылын. 1930-ӧд восянь уджалӧ Коми обласьтса газетын да Коми небӧг лэдзанінын. СССР-са Гижысь котырын 1934 восянь. 1935 восянь веськӧдлӧма Коми гижысь котырӧн да редакторалӧма «Ударник» журналын.

Кыдзи и уна мукӧд гижысьӧс, Шыладорса Мишӧс мыждісны «буржуазнӧй национализмын» да «сепаратизмын», вӧтлісны партияысь да репрессируйтісны. Сійӧс арестуйтӧмаӧсь 1937-ӧд вося йирым тӧлысь 7-ӧд лунӧ. 1938-ӧд вося сора тӧлысь 7-ӧд лунӧ СССР-са НКВД-лӧн торъя сӧвешанньӧ пуксьӧдӧма сійӧс 5 во кежлӧ. Сыкӧд ӧти кадӧ вӧлі пуксьӧдӧмаӧсь Иван Изъюровӧс да Нёбдінса Витторӧс. М. П. Доронин кулӧма Магаданын СССР-са НКВД-лӧн Севвостоклагерса бурдӧдчанінын 1939 вося ӧшым тӧлысь 13-ӧд лунӧ. Коми СССР-са Вылыс ёрдлӧн шуӧмӧн реабилитируйтӧма 1956-ӧд вося моз тӧлысь 3-ӧд лунӧ.

Гижан уджПравить

Михаил Доронин гижӧма кывбуръяс («Паш Колялы», «Узьтӧм войясӧ», «Талун», «Ва катчӧс мӧдӧдчис», «Кык во визьясӧн кыскалӧ плуг...»), но асьсӧ ёнджыка петкӧдлӧма кыдзи критик, гижӧма критическӧй статья, пасйӧд да рецензия жанръясын.

1934-ӧд воын вӧлӧма сӧветскӧй гижысьяслӧн медводдза Ставсоюзса съездлӧн делегатӧн.

ӦшмӧсъясПравить

  • Полещиков В.М. Михаил Доронин (1902—1939) // Репрессированные литераторы. — Сыктывкар, 2008. — С. 198—201.
  • Дёмин В. Н. Михаил Павлович Доронин // Писатели Коми: биоблиографический словарь: в 2- т. / Науч. ред. В. Н. Дёмин. — Сыктывкар, 1995. — Т. 1. — С. 134—136.
  • Зиявадинова О. Михаил Павлович Доронин // Писатели Коми: биоблиографический словарь: в 2- т. — Сыктывкар: «Анбур, 2017. — Т. 1. — С. 255—257.
  • Сыктывдінса шӧр библиотека система

ЫстӧдъясПравить