Крюков Владилен Васильевич
| Крюков Владилен Васильевич |
Крюков Владилен Васильевич (1925—) — коми кывбуралысь, велӧдысь.
Олан туй вежны
Владилен Крюков чужӧма 1925-ӧд вося косму тӧлысь 19-ӧд лунӧ. Ӧтилаын гижӧма, мый сійӧ чужӧма Яренскын.[1] Мӧдлаын — Кардор обласьтын Лена районса Тохта сикт сӧвет улӧ пырысь Савкино грездын. 1934-ӧд воын сылӧн батьыс, Василий Константинович Крюков, фельдшер, вуджӧма семьянас Коми АССР-ӧ, 1934—1956-ӧд воясӧ уджалӧма Удора районса Йӧртымдін сикт бурдӧдчанінын. Уна вося бур уджысь СССР-са Вылыс Сӧвет Президиумлӧн 1951-ӧд вося косму тӧлысь 14-ӧд лунся Шуӧмӧн В. К. Крюковлы сетӧма Ленин орден.
В.В. Крюков 1939—1943-ӧд воясӧ велӧдчӧма Велӧдысьяслӧн институтса Кыв да литература юкӧнын. Сылӧн велӧдысьяс лыдын вӧлӧма СССР-са наука академияысь член-корреспондент, финн-йӧгра кывъяс да войтыр нималана туялысь, профессор Д. В. Бубрих, коді сы кадӧ Сыктывкарса Велӧдысьяслӧн институтын веськӧдлӧма коми кыв да литература кафедраӧн. Лёка аддзӧм вӧсна В.В. Крюковӧс эз босьтны Айму вӧсна Ыджыд тыш вылӧ. «Гӧрд» дипломӧн помалӧм бӧрын сійӧс мӧдӧдісны Удора районса Йӧртымдін сиктӧ, а 1944—1956-ӧд воясӧ сійӧ велӧдӧма Косланса школаын коми, роч, немеч кывъяс, литература.
Гижан удж вежны
Гижны босьтчӧма 5-ӧд классянь, но гижан удж йылысь кутӧма мӧвпавны сӧмын студенталігӧн. Йӧзӧдлӧма войнакӧд йитчӧм кывбуръяс «За новый Север» газетын. Гижӧма комиӧн, рочӧн да немеч кывйӧн, лыддьӧма кывбуръяссӧ велӧдчысьяслы.
1948-ӧд воын котыртӧма «Удораса пионеръяс» литература кружок, кӧні быдмӧмаӧсь нималана коми гижысьяс: Альберт Ванеев, Борис да Леонид Палкинъяс, Юрий Васютов, Анатолий Афанасьев, Валерий Муравьёв, Альберт Попов да мукӧд. Асьныс вӧлі дасьтӧны ки помысь журналъяс.
Ӧшмӧсъяс вежны
- Пунегов В. А. Владилен Васильевич Крюков. — Сыктывкар: Коми кн. изд-во, 1963. — 24 л.б. («Пед. удж кузя мастеръяс» серия)