Лыткин Леонид Александрович

Лыткин Леонид Александрович
Чужан лун:	1930-ӧд вося сора тӧлысь 31-ӧд лун(1930-07-31) (94 арӧс)
Чужанін:	Сыктывкар, Северный край[d], РСФСР[d], Сӧветскӧй Социалистическӧй Республикаяслӧн Союз
Мыйся уджыс:	журналист, гижысь, редактор

Лыткин Леонид Александрович (1930—2016) — коми гижысь, журналист.

Олан туй

Леонид Лыткин чужӧма 1930-ӧд вося сора тӧлысь 31-ӧд лунӧ Сыктывкарын. Велӧдчӧма Олег Кошевой нима Сыктывкарса 12 №-а школаын. 8 класс помалӧм бӧрын пырӧма велӧдчыны республикаса Драма театр бердын театральнӧй студияӧ. Шӧр образование босьтӧма 21-ӧд №-а рытъя школаын. Велӧдчӧма Ленинградса видз-му институтын.

1949-ӧд восянь уджалӧма «Вӧрлэдзысь» газетын литературнӧй сотрудникӧн. Служитӧма Сӧветскӧй Армияын. 1954-ӧд воын бергӧдчӧма уджавны «Вӧрлэдзысь» газетӧ. 1955-ӧд воын Л. Лыткинӧс бӧрйӧмаӧсь Летка райкомын ВЛКСМ-са медводдза секретарӧн. Вит кымын во уджалӧма комсомолын. 1958—1959-ӧд воясын вӧлӧма «Молодёжь Севера» газетын редакторӧс вежысьӧн. Мыйтакӧ уджыштӧма «Красное знамя» республикаса газетын сиктса олӧм юкӧдын веськӧдлысьӧн.

24 во уджалӧма Коми АССР-са телевидение да радиовещаниеысь канму комитетын редакторӧн, а сэсся медыджыд редакторӧн.

Кулӧма 2016-ӧд вося сора тӧлысь 8-ӧд лунӧ.

Гижан удж

«Видз вылын талун шондіа» медводдза висьтсӧ йӧзӧдӧма 1940-ӧд воын «Коми комсомолец» газетын. Сылӧн висьтъясыс петавлӧмаӧсь «За коммунизм» районкостса газетын. «Гӧрд пӧлян» радиожурналын унаысь юргисны сылӧн дженьыд да шмонитана гижӧдторъяс. Йӧзӧдчӧма «Земля родная» (Москва), «Войвыв кодзув», «Чушканзі» да «Би кинь» журналъясын. Гижӧдъясыс веськалӧмаӧсь «Миян грездса челядь» да «Шувгӧны пожӧмъяс» висьтъяса ӧтувъя чукӧръясын.

Леонид Лыткин йӧзӧдлӧма очеркъяса кык небӧг, «Яким пӧль да Шурик» ла «Чулькъяс» повесьтъяс (юкӧнъясыс петавлісны «Войвыв кодзув» журналын).

Бӧръя олан воясас дасьтӧма да йӧзӧдӧма роч кывйӧн «Сыктывкар и сыктывкарцы», «Профессор Худяев», «Наш Борис Иванович» небӧгъяс.

Леонид Лыткинлӧн кывбуръяс вылӧ лӧсьӧдӧма сьыланкывъяс, кодъяс юргӧмаӧсь Москваын Финн-йӧгра войтырлӧн Ставмирса конгресс дырйи.

Общественнӧй удж

Веськӧдлӧма «Сыктывкар» нима историко-мемориальнӧй да культурно-просветительскӧй обшественнӧй котырӧн.

Небӧгъяс

• Лыткин Л.А. Город белых ночей Сыктывкар. — Сыктывкар: Изд-во «Кола», 2010. — 199 с. (1000 экз.)

Наградаяс

• Коми Республикаса нимӧдана уджалысь (2010, сора тӧлысь 1 лун).

Ӧшмӧсъяс

• Жеребцова Н. Летописец республики // «Красное знамя» газет, 2010. Сора тӧлысь 8-ӧд лун.