Предание

Предание – тайö фольклор жанр, паськыда тӧдса вомгора висьт, кодлӧн подувнас лоӧны збыль вӧвлӧмторъяс.

Предание жанрлӧн признакъяс

Сылы лӧсялӧны татшӧм признакъяс:

• преданиеяс висьталӧны збыль историческӧй лоӧмтор йылысь, збыль олысь йӧзӧн вӧчӧмторъяс йылысь, збыль сикт-грездъяс, каръяс, юяс ним артмӧм йылысь;
• преданиелы лӧсялӧ кольӧмторйӧ видзӧдӧм-бергӧдчӧм (ретроспектива);
• предание гӧгӧрвоӧдӧ и туялӧ кутшӧмкӧ вӧвлӧмторъяслысь помкаяссӧ.

Предание сикасалöм

Став текстсӧ позьӧ юкны сюжет да тематика боксянь торъя циклъяс вылӧ:

Чужанін овмӧдӧм йылысь преданиеяс

Край овмӧдӧм йылысь преданиеяс артмӧдӧны «сикт овмӧдӧм» да «культӧвӧй мога объект (вичко, манастыр) кыпöдӧм» мотивъяс. Наын висьтавсьӧ, кыдзи овмӧдчисны сiйӧ либӧ мӧд сиктӧ. Тшӧкыда татшӧм сюрӧса преданиеясын паныдасьӧ топонимическӧй мотив, сюжетыс гӧгӧрвоӧдӧ инним артмӧмсӧ.

Культӧвӧй мога объект панӧм векджык йитчыліс чужанін овмӧдӧмкӧд. Тшӧкыда вичко либӧ крест сувтӧдлiсны керка лэптӧм бӧрын. Шӧр персонажъясӧн лоӧны сикт овмӧдысьяс – ӧти морт либӧ дзонь семья (налӧн нимъяс колисны иннимъясын), пышйысьяс. Культӧвӧй мога объект кыпӧдысьясӧн вермисны лоны найӧ жӧ. Пырджык тайӧ историческӧй морт – Перымса Степан.

Коми преданиеяс серти небӧгъяс

Öшмöсъяс

• Коми фольклор: Хрестоматия / Лӧсьӧдісны да водзкывъяссӧ дасьтісны В.В. Филиппова, Н.С. Коровина. – Сыктывкар: Коми кн. изд-во, 2002. – Л.б. 177-199.