Бурдин Михаил Николаевич
| Бурдин Михаил Николаевич | |
| Чужан лун: |
1948-ӧд вося моз тӧлысь 18-ӧд лун (76 арӧс) |
|---|---|
| Чужанін: | |
| Канму: | |
| Мыйся уджыс: | |
Бурдин Михаил Николаевич (1948) — «Зарни Ань» ансамбльӧн веськӧдлысь, Коми Республикаса нимйӧза артист, Россияса культураын нимӧдана уджалысь.
Олан туй
вежны- Михаил Бурдин чужис Коми Республикаын Кӧрткерӧс районса Ыджыдвидз сикт улӧ пырысь Зулӧб грездын 1948 вося моз тӧлысь 18-ӧд лунӧ. Вит арöсöн бура нин ворсiс гудӧкӧн. Дедыс ветлӧма пес вӧчны Богословӧ. Сэтысь став нажӧтка вылас ньӧбӧма гудӧк. Батьыс Мишалӧн вӧлӧм бура жӧ гудӧкасьӧ. Дерт, и зонка сы гöгöр гартчöма. Ӧкмыс арӧссянь сійӧс тшöкыда вöлi корöны сиктса гаж да кöлысь вылö. Енбиа зонка петкӧдчылöма школаса самодеятельносьтын, районса смотрын. Но и сэки абу думайтӧма лоны музыкантӧн. Мӧвпалӧма киномеханикӧн, историкӧн, археологӧн лоны либӧ мунны велӧдчыны пединститутӧ.
- 1963 воын, кор Михаил Бурдин вöлi велöдчö 8-öд классын, Зулöбас фольклор чукöртан экспедициö локтiс шылад тэчысь, республикаса музучилищеын велöдысь Прометей Чисталев. Сiйö кывзiс енбиа гукöкасьысьлысь ворсöмсö да вöзйис водзö велöдчыны. Тайö паныдасьлöм бöрас, бать-мамлысь кывзысьтöг Михаил Бурдин мунöма Коми мулöн юркарö велöдчыны (кирза сапöгöн, грузовик вылын).
- Музыкальнöй училишӧын Михаил Бурдинӧс кывзӧма уна комиссия, но босьтӧма сӧмын балалайкаӧн ворсны велӧдчыны. Со кыдзи та йылысь гижӧны: «Велöдысьяс пöвстын пукалöмаöсь Яков Перепелица, Прометей Чисталёв да мукöд. Михаил Бурдинкöд пырöмöн тшöтш комиöн шыасьöмаöсь, юасьöмаöсь, кытысь воис да мый кужö. Сійö висьталöма, мый ворсö гудöкöн. Но налöн гудöкыд абу вöлöма, сöмын пö домра да баян. Век жö Михаиллысь донъялöмаöсь сямсö, абу-ö пель вылас ош тувччöма. Шуöмаöсь, мый сылöн, рочасьыштны кö, абсолютнöй слух... Кöть и шуöмаöсь училищеад Михаил Бурдинöс енбиаöн, но велöдчыны ог пö вермöй босьтны. Ыстöмаöсь сійöс мöд жырйö, виолончельöн велöдчыны. Сэтчöс велöдысьыс кывзöма да бара жö Висер вожса зонкатö абу босьтöма. Мун пö сьывны велöдчы. Сэтчö Михаил Бурдин бара абу шогмöма, арлыдыс пö ичöт. А сэки сылы дас нёль арöс вöлöма. Ыстöмаöсь трубаöн ворсысьяс дорö, сэсянь — балалайкаöн ворсны велöдчыны. ...
- — Сэтшöма шогöдліс, — висьталö Михаил Николаевич. — Ошкöны, абсолютнöй слух пö, а некытчö оз примитны. Балалайкаöн эг жö куж ворсны, но кывлі сы вылын троньöдчöмсö. Сэтчö сэсся и босьтісны.
- Первойсö, дерт, Михаил Бурдинлы сьöкыд вöлöма. Ворсны пö кужа, а кабалаö нота гижны ог сяммы. Сэтшöма зільöма, воöн ставсö велöдöма. Мукöдыс узьöны, а сійö калидорас да сод вылас зунясьö.»[1] Училишӧын велӧдчигӧн М.Бурдинӧс казялöма Валентина Есева да корöма ас дорас «Эжва» котырö. Сэні сійö ворсöма балалайкаöн. Ветлывлöма Валентина Есевакöд гастрольöн. Училишӧ помалöм бöрас на дорö и кольччöма.
- Училишӧ помалöм бöрас Михаил Бурдин мунöма пырны Гнесин нима институтö. Но енбиа музыкантöс сэтчö абу босьтöмаöсь. Рöкыд вылö пуксьöма сьöм вылö картіасьны öти студенткöд. Картіасигас суöма комендантыс да юöртöма приёмнöй комиссияыслы. Михаил Бурдинлы колöма нин öти экзамен сдайтны, но картіасьöм понда сійöс весиг абу лэдзöмаöсь сэтчö. Ковмӧма во уджавны В. Есева дорын да вӧлисьти бара пырӧма велӧдчыны.
- Михаил Бурдин босьтiс диплом Н.Римских-Корсаков нима Ленинградса консерваторияын, сійӧс вӧлӧм кольӧдӧны Ленинградса филармонияӧ, но компартия ставсö торкöма. Ленинградса горкомпартияö ыстöмаöсь Коми обкомысь письмö, мый виччысьöны гортас. Ковмӧма бергöдчыны Сыктывкарö, пырны уджавны Филармонияö солист-инструменталистöн. Артистöс медалöмаöсь «Асъя кыа» ансамбльö. Кык во мысти «Асъя кыакöд» ветлöмаöсь ставроссияса конкурс вылö да лоöмаöсь вермысьясöн. «Асъя кыаын» Михаил Бурдин уджалöма дас öти во.
- Филармонияын зілигöн жö аддзöма радейтана пöвсö. Том пöрасö Михаил Николаевич тадзи казьтылӧ: Любакöд тöдмасим, кор сійö локтіс медасьны йöктысьöн. Сэки ме вöлі пыра худсöветö. Веськыда кö шуны, Любалысь йöктöмсö ёнасö эг и донъяв, любуйтчи сылöн мичлуннас. Юрöй дзикöдз кольмис. Гастрольын нин коралі.
- 1974 воын лöсьöдiс да веськöдлiс Коми АССР-са сьылан да йöктан государственнöй ансамбльын йöзкостса инструментъяслöн оркестрöн. 1985 воын Михаил Бурдин ансамбльысь мунöма, а Люба гӧтырыс кольччöма сэтчö.
- 1991 восянь Коми Республикаса фольклор театрын художественнöй веськöдлысь да директор, «Парма» ансамбльӧн веськӧдлысь. Режиссёрöн театрас корöма Светлана Горчаковаöс. Во мысти нин Михаил Бурдин мунöма сэтысь. Кыдзи ачыс шуис, Горчаковакöд удж вылас видзöдласыс торъялöма.
- 1995 восянь Коми Республикаса «Шондiбан» нима йöзкостса творчестволöн канму шöринын творческöй лабораторияöн веськöдлысь. Во мысти культура министерство Михаил Бурдинöс вештöма удж вывсьыс.
- 1996 восянь сійӧ веськöдлö «Зарни Ань» профессиональнöй фольклорно-этнографическöй ансамбльöн. М.Н. Бурдин сьылӧ горшöн, тайӧ ворсöмсö петкöдліс сылы ӧти кöр видзысь. Ачыс ветлывлöма Из сайö да сэтысь кывлöма. Михаил Бурдинӧс тшӧкыда шулывлӧны коми шаманӧн сыысь, мый сьылӧ горшӧн, ворсӧ бубенӧн да шыӧдчӧ Шонді дорӧ.
Уна вося бур уджысь, айму культура да искусство сӧвмӧдӧмысь Михаил Бурдинлы Россияса президент шуӧмӧн 2018 вося косму тӧлысь 9-ӧд лунӧ сетӧма «Россияса культураын нимӧдана уджалысь» почёт ним.
Фестивальяс
вежны«Зарни Ань» ансамблькöд петкöдчӧма уна фестивальын, на лыдын:
Наградаяс
вежны- Коми Республикаса нималана артист (1982)
- Коми Республикаса нимйӧза артист (2004) – шылада искусство сöвмöдöмö пай пуктöмысь
- И.А. Куратов нима канму премиа босьтысь (2011)
- Россияса культураын нимӧдана уджалысь (2018, косму тӧлысь 9 лун)[2]
- «Коми Республикаса культураын ыджыд вермӧмъясысь» медаль (2023)
Ӧшмӧсъяс
вежны- М.Н. Бурдинлöн фотография
- М.Н. Бурдинлöн фотография
- Руководителю ансамбля из Коми «Зарни ань» Михаилу Бурдину присвоено звание народного артиста республики
- Артеев А. Тусовка главного шамана (Михаил Бурдин отпраздновал 60-летие // Молодёжь Севера, 2008. – № 40. – 2 октября
- Макарова Е. Коми шаман чужанлунасьӧ // «Коми му» газет, 2013 во. Моз тӧлысь 15-ӧд лун
