Гам (Изьва район)

Гам (рочӧн Гам) — Коми республикаын Изьва районса Мокчой сикт овмӧдчӧмин улӧ пырысь грезд.

Гам Гам
Му:	Рочму
Статус:	грезд
республика:	Коми республика
район:	Изьва район
Медводдза казьтыштӧм:	1763
Инлыдпасъяс:	0°00′ в. п. 0°00′ а. к.0° в. п. 0° а. к. 0, 0
Официал кыв	коми, роч
Олысьяс	500 морт (2024)
Час кытш:	UTC+3+3
Телефон код:	+7 821 40
Пошта индӧс:	169462
Автомобиль код:	11, 111

Фольклор

Гамын паськалӧмаӧсь Аминько, Мича Вань, Тандзе Маръя йылысь преданиеяс. Быд во Иван лунӧ сикт шӧрын нуӧдӧны гаж.

География

Грезд пукалӧ Изьва юлӧн шуйга берегын. Гамсянь Мокчой шӧрсиктӧдз 3 км, Изьва юрсиктӧдз 7 км. Грездыс артмӧма татшӧм юкӧнъясысь: Вылыс Гам, Улыс Гам, Злӧба, Терпиян, Нӧлынь, Косъёль, Пышпиян, Кӧч мыльк, Катш мыльк.

История

• Артмӧма 1745—1763 вояс костын.
• 1782 — «Гамская» грезд, 157 олысь (75 мужичӧй, 82 нывбаба), индӧма медся тшӧкыда паныдасьысь овъяс.
• 1795 — Гам грездын олӧ 167 морт (77 мужичӧй, 90 нывбаба), 1816 — 248 морт (121 мужичӧй, 127 нывбаба).
• 1835—1850-ӧд воясӧ некымын семья мунлӧмаӧсь Гамысь мӧдлаӧ: Т.Г. Рочев — Уквавомӧ, Е.Г. Рочев — Поромӧсьӧ, Ф.В. Рочев да Т.А. Ануфриев — Щелляюрӧ, П.И. Рочев — Красноборӧ, И.С. Семяшкин — Кедвавомӧ. 1837 воӧ Е.А. Рочев мунӧма Соловецкӧй манастырӧ. Мунлӧмаӧсь и ылӧджык: 1856 воӧ Ф.З. Рочев мунӧма овны Тобольск губерняӧ.
• 1859 — Гамын 51 овмӧс, 440 олысь (206 мужичӧй, 234 нывбаба).
• XIX нэм помын, 1897 воын тані олӧма 588 морт, 1905 воын — 865 морт. 1926 воын Гамын вӧлӧма 137 овмӧс, 709 олысь (325 мужичӧй, 384 нывбаба). Сэсся йӧз лыдыс неуна содіс, но 1970—80-ӧд воясӧ кутіс чинны.

Олысь лыд

Грездын олӧны комияс.

Вояс да олысь лыд
1782	1795	1816	1859	1897	1905	1926	1970	1979	1989	1995	2000	2007
157	167	248	440	588	865	709	863	791	713	734	677	539

Медводдза овъяс

• 1782 — Ануфриев, Дуркин, Истомин, Канев, Рочев, Семяшкин, Терентьев, Хозяинов.

Велӧдӧм

1890-ӧд воӧ Гамын воссьӧма вичко приходбердса школа, 1914-ӧд воын — йӧзӧс велӧдан Министерство бердын ӧти класса школа. Школаыс уджалӧма ас керкаясын. 1927-ӧд воӧ лэптӧмаӧсь выль керка, кӧні ӧнӧдз меститчӧ школа. Гам грездын ӧнія кадӧ уджалӧ ӧкмыс класса школа. Сідзжӧ уджалӧ «Мада» нима челядь сад.

Тӧдчана йӧз

• Ануфриева Альбина Зиновьевна (1940—1996) — коми гижысь. Сійӧ тӧдмӧдіс коми лыддьысьысьӧс нималана изьваса бурдӧдчысь Тандзе Маръякӧд (Рочева Мария Фёдоровна (1866—1962), гижис сы йылысь «Тандзе Марья» казьтылан висьт.
• Любовь Ануфриева (Баяр Люба) (1987) — том коми поэт.
• Вокуев Ермил Михайлович (1992) — том спортсмен, юниоръяс костын мирса чемпион.
• Попов Палладий Иванович (1879-1937) — Гамса Сретенньӧ вичкоын служитысь (1913-1937). 2001-ӧд вося йирым 6-ӧд лунӧ Вежа Синод иерей Палладий Поповӧс индіс вежаӧн да пыртіс XX нэмся Россияса новомученикъяс да исповедникъяс Соборӧ.
• Тандзе Маръя (Рочева Мария Фёдоровна (1866—1962) — Печора да Изьва вожын нималана бурдӧдчысь.

Тӧдчана эмторъяс

• Грезд шӧрын сулалӧ Сретенньӧ вичко, кодӧс лэптылӧмаӧсь 1903-ӧд воӧ.
• Вичко водзын сулалӧ гражданскӧй война кадӧ усьӧм салдатъяслы сиӧм памятник.
• Гамӧ пыранінын (Злӧбаын) ӧнӧдз сулалӧ перна, кӧні дорын ХХ-ӧд нэм шӧрӧдз на нуӧдлісны «скӧт молебенъяс»: од вылӧ лэдзӧм водзын священник киськавліс скӧтсӧ вежа ваӧн.
• Гамын эм Василий Иванович Хозяинов нима парк

Ӧтуввез

• http://www.izhma.ru/about/settlement/21.html

Ӧшмӧсъяс

• Атлас Республики Коми. — Москва, 2000.
• История Коми с древнейших времен до конца XX века: В 2-х т. / Под общей редакцией А.Ф. Сметанина. — Сыктывкар, 2004.
• Жеребцов И.Л. Где ты живешь: Населенные пункты Республики Коми. Историко-демографический справочник. — Сыктывкар, 2000.
• Республика Коми: Административно-территориальное деление на 1 августа 1992 г. Издание пятое. — Сыктывкар, 1992.
• Республика Коми: Энциклопедия. — Сыктывкар, 1997—2000. — Т. 1—3.
• Административно-территориальное и муниципальное устройство Республики Коми (на 1 августа 2006 г.). Издание шестое, официальное / ГУ «ТФИ РК». — Сыктывкар, 2006. — 278 с.

Ыстӧдъяс

Мокчой сиктувса оланінъяс
Ӧнія оланінъяс: Гам • Косъёль • Кулим • Мокчой • Шель •