Тюрнин Николай Алексеевич

Тюрнин Николай Алексеевич
	Тюрнин Николай Алексеевич
Чужан лун:	1956-ӧд вося рака тӧлысь 5-ӧд лун (68 арӧс)
Чужанін:	Сыктывкар, Коми Автономнӧй Сӧветскӧй Социалистическӧй Республика, РСФСР[d], Сӧветскӧй Социалистическӧй Республикаяслӧн Союз;
Канму:	Сӧветскӧй Социалистическӧй Республикаяслӧн Союз; Рочму;
Мыйся уджыс:	коми гижысь, гижысь

Шаблон:Серпасыс абу

Тюрнин Николай Алексеевич (1956) — коми гижысь.

Олан туй

Николай Тюрнин чужис 1956 вося рака тӧлысь 5-ӧд лунӧ Сыктывкарын, но челядьдырйиыс колис Кулӧмдін районса Дереваннӧй сиктын.

Комын воысь дырджык Николай Алексеевич уджаліс коми печатьын: «Югыд туй» (ӧні — «Коми му») газетын, дас сизим во — «Би кинь» журналын; корреспонденталіс Коми радио да телевидениеын.

Гижан удж

Николай Тюрнин гижӧ комиӧн и рочӧн. Гижӧдъясыс петавлісны «Эжва весьтын кодзувъяс» (1988), «Мелiлуныс пыдӧстӧм и помтӧм» (1995), «Лӧсасъяс» (1999), «Гудӧк шысьыс он и пӧтлы» (2007), «Дереваннӧй сиктӧй — менам сьӧлӧмшӧр» (2008), «Строка, летящая в огонь» (2005), «Летящей мысли яркий луч» (2005), «След на северной земле» (2006), «Капельки жизни» (2008) небӧгъясын, «Сыктывкар» да «Парма» (Москва) альманахъясын, «Парма», «Войвыв кодзув» да «Би кинь» журналъясын. Вуджӧдӧм кывбуръяссӧ йӧзӧдлывлісны «Кизили» (Ижкар), «Кече» (Йошкар-Ола) да «Сабыйга» (Казань) челядьлы журналъясын.

Николай Тюрнин ёнджыка тӧдса кыдзи поэт-песенник; кывбуръяс вылас гижӧма 100 сайӧ сьыланкыв. Н.А. Тюрнин торъя да ӧтувъя небӧгъясын йӧзӧдiс ныв-зонпоснилы уна кывбур, кодъяс вочасӧн лоины сьыланкывъясӧн. Сiдз, 2007 воын «Василей» конкурс дырйи поэтлӧн чужан сиктлы сиӧм «Сюа чомйӧй, Дереваннӧй!» сьыланкыв шедӧдіc Гран-при. А «Сьыланкывкӧд коля» сьылан лои республикаса челядьлӧн ӧнiя кадся сьыланкывъя фестивальлы кыпӧн. Николай Тюрнин тӧдса кыдзи ӧнія коми сьыланкывлӧн регионъяскостса челядь фестиваль котыртысь; сійӧс нуӧдӧны ӧтчыдысь кык вонас.

Кывбуръясыслы шыладсӧ гижӧны нималана композиторъяс Борис Тюрнин, Гений Горчаков, Гелий Кочанов, Владислав Можайкин, Марк Новосёлов, Василий Чувьюров.

Н.А. Тюрнин тӧдса и кыдзи комиӧдчысь. Вуджӧдіс Виктор Кушмановлысь, Андрей Каневлысь, Дмитрий Фроловлысь, Алексея Карповлысь, Митрофан Курочкинлысь роч кывбуръяссӧ, Удмуртияысь Надежда Лопатинаӧс, Мари Элысь Василий Крыловӧс, Татарстанысь Амир Махмудовӧс да Шамиль Маннаповӧс.

Кывбуръяссӧ вуджӧдӧма фин, мари, удмурт да тотара кывъяс вылӧ.

Авторлӧн кывбуръясыс да вуджӧдӧмъясыс пыртӧма школаса велӧдчан небӧгъясӧ.

Фин-йӧгра небӧгъяслӧн регионъяскостса фестиваль дырйи (Саранск, Республика Мордовия) «Под морозный перезвон» небӧгыс вӧлі шуӧма челядь сьыланкывъяса медбур чукӧрӧн, гижысь Николай Тюрнин да шылад тэчысь Марк Новосёлов лоины «Литературная Финно-Угрия» конкурсын лауреатъясӧн.

«Золотой фонд прессы» войтыркостса выставкаӧ пырӧдчысь.

Н.А. Тюрнинлы сетлісны Витебскса сынӧд-десант дивизиялӧн «Гвардеец» газетлысь, Россияса журналист котырлысь, Коми АССР-са Вылысь Сӧветлӧн Президиумлысь, Коми Республикаса печать управлениелысь грамотаяс.

Н.А. Тюрнин пырӧ концертнӧй деятельяслӧн Россияса котырӧ, Россияса журналист котырӧ; «Российский союз прессы» ставроссияса ӧтйӧза котырӧ Почётнӧй пырысь.

Небӧгъяс

Комиӧн

Тюрнин Н.А. Тэнад арлыдаӧн коля: кывбуръяс, сьыланкывъяс, нӧдкывъяс. — Сыктывкар: Коми небӧг лэдзанін, 2006. — 32 лб.
Тюрнин Н.А. Сьыланкывъя востым. Песенные зарницы: сьыланкывъяс, песни / Серпасаліс В.А. Клейман. — Сыктывкар: Изд-во «Кола», 2015. — 112 лб. (комиӧн, рочӧн, фин кывйӧн)

Рочӧн

Тюрнин Н.А. Время вечно для любви. (2006)
Тюрнин Н.А. Под морозный перезвон. (2007)

Наградаяс

Коми Республикаса нимӧдана уджалысь
Культура юкӧнын Коми Республикаса Веськӧдлан Котырлӧн премиа босьтысь (2008).
Россияса культураын нимӧдана уджалысь.