Пожӧг (Кулӧмдін район)

Пожӧг (рочӧн Пожег) – Коми Республикаса сикт, Кулöмдiн районысь Пожӧг сикт овмӧдчӧминса шӧрсикт.

Пожӧг Пожег
Му:	Рочму
Статус:	сикт
республика:	Коми республика
район:	Кулӧмдiн район
Медводдза казьтыштӧм:	1676 во
Инлыдпасъяс:	61°58′40″ в. п. 54°20′07″ а. к.61.977778° в. п. 54.335278° а. к. 61.977778, 54.335278
Официал кыв	коми, роч
Олысьяс	499 морт (2007)
Час кытш:	UTC+3+3
Телефон код:	+7 8 2137
Пошта индӧс:	168097
Автомобиль код:	11, 111
Официал сайт

Ним артмӧм

Пожöг ним артмис Пожӧг ю нимсянь, код бокö и лэптiсны медводз сиктсö. Нимыс артмӧма «пожег», «пожега» (важмӧм кыв — «поджег», «поджигать, поджечь» кадакывъясысь) кывъясысь, кодлӧн вежӧртасыс «тыла, биӧн сотӧм вӧр тыла».

Фольклор

Пожӧг сиктса Культура керкаын эм уна пӧлӧс кружок да мероприятиеяс , кӧнi водзӧ нуӧдӧны , сьылӧны да оз вунӧдны важ коми сьыланкывъяс. Эм "Зарни куд "сьылан котыр да "Задоринка" йӧктан котыр . Сиктын буретш быд ыджыд праздник вылӧ вӧччӧ концерт. Челядь ветлӧны быдсяма конкурсъяс вылас , татшӧм кыдзи "Василей" сьылан конкурс , кодi мунӧ Куломдiнын.

География

Сикт пукалö Эжва юлӧн шуйга берегын, Пожöг ю вомсянь 4 км сайын. Пожӧгсянь Кулӧмдiн юрсиктӧдз 55 км.

Кулöмдiн районса олысьяслы — пожöгсаяс, тайö абу сöмын Пожöг сиктсаяс, но и овмöдчöминö пырысь мукöд грездын олысьяс. А Пожӧг овмӧдчӧминӧ пырöны: Полльӧ (Великополье), Пожӧгдін, Мальӧ, Вомынъюр, Вомынбӧж, Шахсикт, Кекур. Водзынсӧ нӧшта вӧлі татчö пырӧны Вомын да Сьӧдтыдін. Сиктъясас олöмыс кусöма нин, йöз сöмын гожöмнас нин турун пуктiгöн овлöны.

История

• Тайӧ сикт гӧгӧрыс йӧз олісны важ мезолит кадӧ, а сідзжӧ неолит кадӧ да эзысь нэмӧ.
• Сикт артмӧдісны 1676 воын кресьтянаяс: Афанасий Васильевич (ов абу пасйӧма) да Яков Осипович Шахов Кибраысь, Гаврил Тимофеевич Лежанев да Кирилл Стахеевич Левин Визинысь, Марк да Нифонт Ивановичьяс Мартюшевъяс Межадорысь, Анкудин Петрович Вага ю вожысь, Лука Иванович Каргопольысь, Архип (ов да вич абу пасйӧма) — Тотьма уездысь.
• 1678 во — Пожöг сикт йылысь медводдзаысь пасйöма Йӧзӧс гижалан небӧгын: «Починок Усть-Пожег на устье реки Пожег, тому 2 года, поселился Афонька Васильев...», 5 овмӧс.
• 1686 — Кыпӧдісны пуысь Троича вичко.
• 1707 — Погостын («что был починок Пожег на реке на Вычегде на усть речки Пожега») вӧлі вичкоса уджалысьяслӧн 3 овмӧс, кресьтяналӧн 7 овмӧс (кыкыс куш кӧзяинъясыслӧн кулӧм бӧрын). Пасйӧма олысьяслысь овъяссӧ.
• 1720 — чужöма Великополье грезд. Медводдза олысьясыс — роч йöз, Пашнинъяс. 44 во ковмис, медым чужисны мукöд пöчинок: Кекур, Шахсикт, Габсикт, Вомынъюр, Вомынбöж, Мальӧ, Сьӧдтыдiн, Ыба. Пожöг да Великопольеын кö медводдза олысьясыс вöлiны роч йöз, то мукöд сикт нимыс коми нога нин, мый нöшта öтчыд тöдчöдö, мый олысьясыс – комияс. Видз-му вöдитлöмаöсь да вöравлöмаöсь. Урожайыс омöль вöлöма. Полльӧсалöн сöмын няньныс абуджык кынмавлöма.
• 1784 — Сиктын вӧлі 62 овмӧс, 495 морт; 1859 — 130 овмӧс, 931 морт.
• 1861 — Воссис школа, но регыд мысти тупкысис.
• 1862 — Ф.А. Тентюкова серти, кыпӧдӧма кирпичысь вичко
• 1887, рака тӧлысь 3 лун — Выльысь воссис вичко бердса школа. 1893 воын уездса земство гижӧма школа йылысь: «бедная обстановкой и содержанием».
• 1870-ӧд воясӧ лои земскӧй пошта станция, 1904 — воссис библиотека.
• 1892 — Сикт улӧ пырысь грездъясын оліс 1255 морт.
• 1903, тӧвшӧр тӧлысь 1 лун — Помӧсдін вӧлӧсьтса «Пожӧг общество» лои торъя «Пожӧг вӧлӧсьтӧн».
• 1926 — Пожӧгын вӧлі 29 овмӧс, 127 морт; Габсиктын — 30 овмӧс, 167 морт; Шахсиктын — 68 овмӧс, 277 морт. Орчча Пожӧгдін, Вомынъюр да Вомынбӧж грездъясын вӧлі 164 морт, 830 морт.
• 1930 — Сиктын вӧлі фельдшерско-акушерскӧй пункт, школа, изба-читальня, му ӧтлан вӧдитан товарищество, паракод сувтанін, потребительяслӧҥ котыр, кредит сетан товарищество, милиция участок, кресьтяналы общественнӧй отсӧг сетан комитет. Шахсикт грездын вӧлі видз-му коммуна.
• 1949 — Босьтчисны кыпӧдны Пожӧгса ГЭС, коді уджаліс 1960-ӧд вояс шӧрӧдз.
• 1989 — Сиктын оліс 570 морт (269 мужичӧй, 301 нывбаба), ставныс коми.
• 1995 — 194 овмӧсын олӧ 553 морт; 2000 — 183 овмӧсын олӧ 562 морт.
• 2012, вӧльгым тӧлысь — Сикт овмӧдчӧминын восьтӧма 45 №-а би кусӧдан юкӧн.
• 2012, ӧшым тӧлысь 1 лун — сиктын восьтісны лызьӧн котралан выль база. Воліс войтыркостса спорт мастер, XVIII тӧвся Олимпиада ворсӧмъяс (Япония, Нагано, 1998 во) вылӧ ветлысь Андрей Нутрихин.

Олысь лыд

Лыд
1926	1970	1979	1989	1992	2000	2007	2012
127	609	666	570	560	562	499	521

Медводдза овъяс

• 1676 во — Лежанев, Левин, Мартюшев, Шахов.
• 1707 — Лежанев, Канев, Левин, Мартюшев, Мингалёв, Пашнин, Паршуков, Шахов.

Вичко

Cиктлöн история оз ло тырвыйööн сиктса вичко йылысь висьтавтöг. Религия вöлi тöдчана крестьянин олöмын. Вичколöн историяыс Пожöг сиктын зэв дженьыд. Вичко заводитісны лэптыны 1864-öд вося ӧшым тӧлысь 31 лунö, а эштöдісны 1869 вося моз тӧлысь 23-öд лунö. 1871 воын вöлöстьса правление сетіс 49,5 десятина му, бурöс и лекöс. Мусö сетісны прихожана тшöктöм серти. Но сöмын 17 десятина вылын вöлі позьö гöрны. Вичколы вöлі сетöма Троицкöй ним. Вичко лэптісны ю дорö матын, и сійö тыдалö став грездсянь. Первой сійö вöлі вöчöма керъясысь, но бöрын лэптісны кирпичысь. Сідз жö лэптісны часовняяс Полльӧын – Святого Николая Пречистого, Кырнышаын – Рождества Пресвятой Богородицы.

Пожöг вичко историяын вöлі сöмын куим поп. 1869–1885 воясö Михаил Андреевич Шейтанов; 1885–1896 воясö Александр Сапожников; 1896–1917 воясö Василий Тюрнин.

1885 воын вичко бердын том поп Александр Сапожников восьтіс медводдза школа прихожаналы. «Вӧлӧгда Епархияса ведомосьтъяс» газет пасйö: «1887 вося рака тӧлысь 3-öд лунö воссис öти класса вичкобердса школа». Сэні велöдісны лыддьысьны, мича гижны (чистописание), роч кыв, вичкоса славяна кыв, «Закон божий».

Овмöс

Сикт овмӧдчӧминын уджалӧны:

• «Пожег» СПС — йӧла да яя сёян вӧчӧм-вузалӧм
• «Нехорошева А.А.» да «Третьяков А.В.» ас вылӧ уджалысьяс — вӧр пилитӧм да иналӧм
• Вузасянінъяс: «Барс» ИКК, Кулӧмдінса сельпо, «Светлана» ИКК, ас вылӧ уджалысьяс — Уляшева М.Н., Шахова А.М., Игнатова М.В.
• Йӧзӧс новлӧдлӧны ас вылӧ уджалысьяс: Игнатов А.А., Игнатов И.Д., Попов В.В. да Лажанев К.В.

Культура

Пожӧгын эм Культура керка, клубъяс уджалӧны Пожӧгдінын, Полльӧын, Улыс Ярашъюын да Ярашъюын. Культура керкаын эм сиктса библиотека.

Велӧдӧм

2012 воын Пожӧг сиктын эм шӧр школа, челядь сад, содтӧд тӧдӧмлун сетан республикаса шӧринлӧн Пожӧгса филиал; Ярашъюын — школа да сад, Полльӧын — челядь сад, Кекурын — «Начальнӧй школа — челядь сад», Пожӧгдінын — челядь сад.

Тöдчана йöз

• Шейтанов Михаил Андреевич – сиктса медводдза поп (1869-1885)
• Сапожников Александр – поп, восьтiс сиктас медводдза школа (1887)

Нималана йӧзлӧн список тані:.

Гижысьяс

• Шахов Николай Александрович (1898—1942) — коми гижысь
• Шахов Егор Александрович (1907—1938) — коми гижысь
• Шахов Борис Федотович (1928—2002) — коми гижысь
• Лудыков Михаил Ильич (1930—2005) — коми гижысь, велӧдысь
• Шахов Пётр Федотович (1931—2006) — коми гижысь
• Лужиков Александр Михайлович (1964—2006) — коми поэт
• Шомысов Владимир Игоревич (1954—2021) — коми поэт, журналист
• Лудыкова Лилия Васильевна
• Сенькина Галина Николаевна

Ленин орден босьтысьяс

• Шебырева Анна Корниловна — «Пожӧг» совхозса лысьтысьысь, Ленин орден (1976) да Октябрса революциа орден (1971) босьтысь
• Сенькин Василий Савельевич — милицияса старшӧй сержант, Ленин орден босьтысь (1967)

Уджвывса Гӧрд Дӧрапас орден босьтысьяс

• Шахова Анна Модестовна — «Пожӧг» совхозса лысьтысьысь (1973)
• Мингалёва Елена Тимофеевна — «Пожӧг» совхозса лысьтысьысь
• Шахова Анна Ниофитовна — «Пожӧг» совхозса водитель
• Сенькина Анна Варфоломеевна — «Пожӧг» совхозын уджалысь (1971)
• Дёмин Евлогий Филиппович — «Пожӧг» совхозлӧн Полльӧ юкӧнӧн веськӧдлысь (1977)
• Третьякова Мария Алексеевна — «Пожӧг» совхозса лысьтысьысь (1973)

Коми Республикаса нимӧдана уджалысьяс

• Мартюшева Мария Федотовна — «Пожӧг» совхозлӧн Полльӧ юкӧнын бригадир
• Игнатов Степан Григорьевич — Вылыс Эжваса леспромхозын водитель
• Шахова Мария Федоровна — «Пожӧг» совхозса лысьтысьысь
• Дёмин Евлогий Филиппович — «Пожӧг» совхозлӧн Полльӧ юкӧнӧн веськӧдлысь (1972)
• Третьякова Агния Михайловна — бригадир (1983)
• Шебырев Ревокат Александрович — плӧтник (1983)
• Третьяков Николай Арсентьевич — тракторист (1996)
• Третьяков Борис Кириллович — рабочӧй (1996)
• Сенькин Василий Иванович — «Пожӧг» СПК-са веськӧдлысь (2001), «Кулӧмысь мездӧмысь» медаль (2004)
• Третьяков Иван Андреевич — тракторист (2004)

СССР-са Вылыс Сӧвет депутатъяс

• Сенькин Николай Васильевич — «Дружба» колхозса веськӧдлысь (Вомынбӧж)
• Уляшева Вера Николаевна — «Пожӧг» совхозса бригадир
• Игнатов Степан Григорьевич — Вылыс Эжваса леспромхозын водитель

Сюмӧд, йӧг да ньӧрйысь вӧчасьысьяс

• Лужиков Николай Дмитриевич
• Шомысов Владимир Игоревич
• Игнатов Евгений Алексеевич
• Пашнина Галина Валериановна
• Токмакова Ольга Васильевна

Мукӧд

• Мингалёв Валерьян Михайлович — военнӧй авиациаса подполковник, техническӧй наукаясса кандидат; чужис Пожӧгдінын, оліс Москва обласьтса Люберцыын.

Тӧдчанаторъяс

• Троича вичко
• Айму вӧсна Ыджыд тышын усьӧмаяслы паметник

Ӧтуввез

• Пожӧг сикт овмӧдчӧмин
• Пожӧг сикт овмӧдчӧминлӧн Веськӧдланін

Öшмöсъяс

• Жеребцов И.Л. Где ты живешь: Населенные пункты Республики Коми. Историко-демографический справочник. ― Сыктывкар, 2000. — 448 с.
• Игнатов М.К. Взгляд сквозь годы. – Сыктывкар: Коми небöг лэдзанiн, 1998. – 224 с.
• Игнатов М.К. Усть-Куломский район: помни прошлое, зная настоящее, делай будущее (1620–2008). – Сыктывкар, 2009. – 366 с.
• История Коми с древнейших времен до конца XX века: В 2-х т. / По общей редакцией А.Ф. Сметанина. – Сыктывкар, 2004.
• Республика Коми: Энциклопедия в 3 т. ― Сыктывкар, 1997-2000. ― Т. 1―3.
• Пожöг да сы гöгöрса сиктъяслöн нимтысян нимъяс