Сметанина Раиса Петровна
Раиса Петровна Сметанина (1952) — Сöвет кадся нималана лызьöн котралысь, Олимпиада ворсӧмъясын унаысь вермысь (1976, 1980, 1992), Ставмирса да СССР-са чемпионатъясын лызьöн котралöм серти унаысь вермысь, СССР-са спортын заслуженнӧй мастер (1976).
| Сметанина Раиса Петровна | |
 | |
| Чужан лун: |
1952-ӧд вося урасьӧм тӧлысь 29-ӧд лун[1] (72 арӧс) |
|---|---|
| Чужанін: | |
| Канму: | |
| Мыйся уджыс: | |
| Ошканпасъяс да премияяс: | |
 Сметанина Раиса Петровна на Викискладе | |
Олан туй вежны
Раиса Сметанина чужӧма 1952-ӧд вося урасьӧм тӧлысь 29-ӧд лунӧ Коми АССР-ын Изьва районса Мокчой сиктын кӧр видзысьяслӧн семьяын. 1967-ӧд воын помалӧма Мокчойса 8 класса школа, 1970-ӧд воын — И.А. Куратов нима Сыктывкарса педагогическӧй училище.
1992-ӧд восянь уджалö Коми Республикаын «Медвылыс спорт мастерство серти Сыктывкарса школаын» лызьӧн котралӧм кузя медыджыд тренер-велӧдысьӧн, экспертӧн.
Лызьöн котралöм вежны
Лызьöн котралöмысь медводдза наставникъясöн вöлiны ыджыдджык вок Илля да физкультураысь велöдысь, а медводдза ордйысьöмъясöн – сиктса да районса тшупöдын. Иван Куратов нима педучилищеын велöдчигöн Раиса Сметанина пырöдчис республикаса да ставсоюзса ордйысьöмъясö, кöнi сiйöс казялiс СССР-са нывбабаяс сборнöйын медшöр тренер Виктор Иванов. 1972 воын Р.Сметанинаöс корисны ыджыд спортö да пыртiсны лызьöн котралöм серти СССР-са öтувтöм котырö.
СССР-са чемпионатъяс вежны
Кызь сайö во Раиса Сметанина вöлi странаын лызьöн котралöмысь медвына спортсменöн. СССР-са чемпионатъясын сiйö шедöдiс 21 зарни (1974, 1976—1977, 1983—1986, 1989, 1991 воясын), 14 эзысь да 15 ыргöн медаль.
Ставмирса чемпионатъяс вежны
Ставмирса чемпионатъяс вылын нималана лызьöн котралысь босьтiс 5 зарни (1974, 1978, 1982, 1985, 1991), 5 эзысь да 4 ыргöн медаль.
Тöвся Олимпиада ворсöмъяс вежны
- 1976-ӧд воын Инсбрукын (Австрия) XII тӧвся Олимпиада ворсӧмъяс дырйи шедöдiс кык зарни медаль — 4х5 км вылö эстафестаын да 10 км вылö классическöй стильöн котöртöмын, а сiдзжö öти эзысь медаль 5 км вылö классикаöн.
- 1980-ӧд воын Лейк-Плэсид карын (АӦШ) XIII тӧвся Олимпиада ворсӧмъяс дырйи вöлi медъёнöн 5 км вылö классическöй стильӧн котöртöмын да содтiс аслыс эзысь медаль 4х5 км вылö эстафетаын.
- 1984-ӧд воын Сараевоын (Югославия) XIV тӧвся Олимпиада ворсӧмъяс дырйи босьтiс кык эзысь медаль: 10 да 20 км вылö котöртöмын.
- 1988-ӧд воын Калгариын (Канада) XV тӧвся Олимпиада ворсӧмъяс дырйи вöлi мöдöн 10 км вылö классика стильöн котöртöмын да нöшта босьтiс «ыргöн» медаль 20 км вылын.
- 1992-ӧд воын XVI тӧвся Олимпиада ворсӧмъяс дырйи Альбервильын (Франция) шедöдiс зарни медаль 4х5 км вылö эстафетаын.
Р.П. Сметаниналöн рекордъяс вежны
- Медуна награда (ставнас – 10) нывбабаяс пöвстын тöвся Олимпиада ворсöмъяс дырйи, та мында жö сöмын итальянка Стефания Бельмондолöн
- Медводдза спортсменка (кыдзи нывбабаяс, сiдзи и мужичöй пöвстын), кодi сяммис босьтны медальяс öтпырйö 5 тöвся Олимпиада ворсöмъяс вылын.
- Раиса Сметанина ветлiс öтпырйö вит тöвся Олимпиада ворсöмъяс вылö, а ассьыс бöръя медальсö босьтiс Альбервильын 1992-öд вося XVI тöвся Олимпиада ворсöмъяс вылын аслас 40-öд чужан лунöдзыс, мый лоö аслыспöлöс рекордöн лызьöн котралысьяс пöвстын.
- Ставнас нималана спортсмен мирса чемпионат да Олимпиада ворсöмъяс вылын босьтiс 26 награда. Ставмирса Олимпиада комитетлöн (рочӧн - МОК) шуöм серти, Раиса Сметаниналы вöлi вичмöдöма Кубертен нима войтыркостса приз.
- Р.П. Сметанина – Коми Республикаын медся титулованнöй лызьöн котралысь.
- «Associated press» ставмирса юöр сетан агентство нуöдiс опрос, код серти Раиса Сметанинаöс шуöма XX-öд нэмся медся нималана спортсменкаяс лыдын.
- Раиса Сметанина вöлi тöвся Олимпиада ворсöмъясын 4-ысь чемпионкаöн (1976 воын – 10 км вылö котöртöмын да 4 х 5 км вылö эстафетаын; 1980 воын – 5 км вылö котöртöмын; 1992 воын – эстафетаын), 5-ысь эзысь медаль (1976 воын – 5 км вылö котöртöмын, 1980 воын – 4 х 5 км вылö эстафетаын, 1984 воын – 10 да 20 км вылö, 1988 воын – 10 км вылö котöртöмын) и öтчыдысь ыргöн медаль босьтысьöн (1988 воын – 20 км вылö котöртöмын); 5-ысь мирса чемпионкаöн (1974, 1978, 1982, 1985, 1991), СССР-са чемпионка (1974, 1976-1977, 1983-1986, 1989, 1991 воясын).
Видзöдöй сiдзжö вежны
- Кулакова Галина Алексеевна — лызьöн котралысь.
Наградаяс вежны
- Ленин орден
- «Почёт пас» орден (1976) – физическöй культура да спорт сöвмöдöмысь, зiльöмысь да сямысь
- Уджвывса Гӧрд Дӧрапас орден (1980)
- Войтыръяслӧн Ёрталун орден (1984)
- Октябрса революциа орден (1988)
- «ЮНЕСКО» вичмöдiс торъя приз – «Спортын благородствоысь» (1993)
- Почёт орден (2003, тӧвшӧр тӧлысь 17-ӧд лун)
- «Коми Республикалы 100 во» медаль (2021)[2]
- «Айму водзын бур уджысь» IV тшупӧда орден (2022)[3]
Мукӧдтор вежны
- Р.П. Сметанина нимӧн шуӧма Сыктывдін районса Выльгорт сикт дорса лызь стадион.
- Сыктывкарын Тентюков улича вылын восьтӧма Р.П. Сметанина нима керка-музей.
Ӧшмӧсъяс вежны
Ыстöдъяс вежны
- ↑ Encyclopædia Britannica
- ↑ Глава Коми вручил государственные награды Российской Федерации и Республики Коми // «Комиинформ» юӧр сетан агентство (2021.08.20-ӧд лун; рочӧн
- ↑ Указ Президента Российской Федерации от 21.02.2022 № 70 «О награждении государственными наградами Российской Федерации» // Официальный интернет-портал правовой информации (2022.02.21-ӧд лун; рочӧн)