Торлопов Георгий Иванович

Торлопов Георгий Иванович
Чужан лун:	1913-ӧд вося вӧльгым тӧлысь 10-ӧд лун(1913-11-10)
Чужанін:	Паль, Яренск уезд, Вӧлӧгда губерния, Россияса империя Яренск уезд, Вӧлӧгда губерния, Россияса империя
Кулан кад:	2001-ӧд вося йирым тӧлысь 10-ӧд лун(2001-10-10) (87 арӧс)
Куланін:	Сыктывкар, Рочму
Канму:	Сӧветскӧй Социалистическӧй Республикаяслӧн Союз  Рочму
Мыйся уджыс:	гижысь, учёный-литературовед

Торлопов Георгий Иванович (Ивӧ Ёгор; 1913—2001) — коми гижысь, вуджӧдчысь, коми литература туялысь, критик.

Олан туй

Георгий Иванович чужӧма 1913-ӧд вося вӧльгым тӧлысь 10-ӧд лунӧ Вӧлӧгда губерняысь Яренск уездса Паль сиктын (ӧні — Коми Республикаса Сыктывдін район). Начальнӧй школа помалӧм бӧрын уджалӧма Усть-Сысольскын кирпич вӧчан заводын. Айкатыласа профтехшколаын босьтӧма слесар, кӧрт кузя токар, дорччысь, жестянщик да трактористлысь специальносьтъяс. 17 арӧссянь куим во уджалӧма «Комилес» трестлӧн Ношульса трактор базаын. Кардорын куим тӧлысься курсъяс вылын велӧдчӧм бӧрын уджалӧма Луздор районса комсомол комитетын, а сэсся ВЛКСМ-лӧн Коми обкомын секретарлӧн отсасьысьӧн.

1936-ӧд восянь редакторалӧма «Коми комсомолец», «Вöрлэдзысь», «Колхозник» (Сыктывдін район) газетъясын, радиоын. 1952—1953-ӧд воясын вӧлӧма медшӧр редакторӧн «Войвыв кодзув» журналын.

1955-ӧд воын помалӧма партийнӧй школа. Вӧлӧма КПСС обкомысь пропаганда юкӧдын веськӧдлысьӧс вежысьӧн, Коми АССР-са гижысь котырлӧн правленньӧса веськӧдлысьӧн (1958 восянь), Коми радиокомитетын старшӧй редакторӧн, Коми радиоын шӧр редакторӧн. 1976 воын петӧма пенсия вылӧ.

Кулӧма Сыктывкарын 2001-ӧд вося йирым тӧлысь 10-ӧд лунӧ.

Гижан удж

Ассьыс «Выль керка» медводдза висьтсӧ Георгий Торлопов йӧзӧдӧма 1936-ӧд воын.

Георгий Торлопов пырӧма коми литератураӧ медводз кыдзи вуджӧдчысь. Комиӧдӧма роч классикаысь нималана гижӧдъяс: А. С. Пушкинлысь «Дубровский», «Слово о полку Игореве», В. Василевскаялысь, Викентий Вересаевлысь, Б. Горбатовлысь, Александр Авдеенколысь романъяс да мукӧд гижӧд.

Сёрӧнджык шыӧдчӧма критика дорӧ да йӧзӧдӧма коми литература йылысь некымын статья — Нёбдінса Виттор, Тима Вень, Иван Вавилин, Николай Фролов (Сук Парма) да мукӧдлӧн гижӧдъяс йылысь.

Таысь кындзи, Г.И. Торлопов вӧлӧма антологиа да гижӧд чукӧр, коми литератураысь бӧрйӧм гижӧдъяс дасьтысьӧн. Медшӧр уджъяс лыдын: «Коми поэзия антология» (1967), Нёбдінса Витторлӧн куим небӧга йӧрым, Тима Веньлӧн, Илля Васьлӧн да Николай Шаховлӧн (Сандрик Микол) бӧрйӧм гижӧдъяс. Георгий Торлопов гижӧма «Писатели Коми АССР» справочник (петавлӧма кыкысь — 1961, 1970).

1990-ӧд воясӧ чукӧртӧма Илля Васьлысь литературно-критическӧй гижӧдъяссӧ, помалӧма Иван Куратовлӧн гижӧдъясын кыв йылысь ыджыд удж.

Гижысь котырын 1954-ӧд восянь.

Ӧшмӧсъяс

• Коми Республикаса национальнӧй небӧгаин
• Выставка «Погиб поэт…» (2012.02.09; рочӧн)
• Дёмин В. Н. Георгий Иванович Торлопов (1910—2001) // Писатели Коми: биобиблиографический словарь. — Сыктывкар, 2001. — Т. 2. — С. 339—344.
• Белых И. И. И кывбур гижис, и вуджӧдчис // «Коми му», 2013 во, вӧльгым тӧлысь 14-ӧд лун, 45 №.